داغ داغا یئتیشر

 ایكی سئودا آراسیندا قالانلار وار

بیر سئودانین یاریسیندا قالانلاردا

**********************

سئودامیزین آراسیندان

قارا داغلار چاپیلدی

بئتون آرمه كورپولر ده  یاپیلدی

آیریلساق دا آغلامادیق

كور، آراز

نازلی ،دلی،

آجی، شیرین،  نئچه چای.

آغلامادیق

دوز دریاسی

 قورودو.

نه بیلیردیك

قوراخلیقدیر سون اوج،

آیریلیقلارا .

*********************

بیزده بیر آنلامسیز[1] آتا سوزو وار

داغ داغا یئتیشمه یه جك میش

آنجاق

یئتیشه جك میش، بیر بیرینه آداملار

آما نیسه[2]  ...

قول قولادیر

 بیر بیرینه یئتیشمه یه ن  او داغلار!

هله لیك

آیریلیقلار آیناسی دیر

 كیملیگیمی[3] بیلیندیره ن

واراغلار.

احمد محمدپور

عشق اودو

قد انار العشق للعشاق منهاج الهدی (۱)

سالك- راه- حقیقت عشقه ائیلر اقتدا

عشقدیر اول نشئه‏ی- كامل كیم، اونداندیر مودام

مئیده تنویر- حرارت، نئیده- تأثیر- صدا

وادی- وحدت حقیقتده مقام- عشقدیر

كیم، موشخّص اولماز اول وادی‏ده سولطاندان گدا

ائیله‏مز خلوت‏سرای- سِرّ- وحدت محرمی

عاشقی معشوقدن، معشوقی عاشقدن جودا

ائی كی، اهل- عشقه سؤیلرسن: ملامت تركین ائت

سؤیله كیم، مومكون‏مودور تغییر- تقدیر- خودا؟

عشق كِلكی چكدی خط حرف- وجود- عاشقه

كیم، اولا ثابت حق اثباتیندا نفی- ما ادا

ائی فضولی انتهاسیز ذؤق بولدون عشقدن

بؤیله‏دیر هر ایش كی، حق آدی‏له قیلسان ابتدا

فضولی

(۱) عشق عاشق لر اوچون هدایت یولونو ایشیقلاندیردی

هله ده كی قورخورام

اوشاغیكن قورخاردیم

                  بیر آن دا قارانلیقدا

                           یالقیز بؤراخیلماقدان.

دئمه  اوتورمؤشؤمؤش

               اؤره ییمده، جانیمدا

                  سنسیزلیك گونلرینین

                                       سویوق تری،

                                                   قورخؤسؤ.

هله ده وار قورخؤرام

               آی سیز آیاز گئجه لر

                       سن سیز بؤراخیلماقدان.

احمد محمدپور

ایكینجی مكتوب( نازلیا)

آنلاتسانا نازلی، سن جه بیر یئتیم فاغیرین تك دیله یی اولماق نه قدر وارلیلیقدیر؟ تامام بوشلوقلارین، یوخلوقلارین، و ده كیمسه سیزلیكلرین  یئرینی بیر باشا دولدورا بیلمك نه بویدا بؤیؤكلؤك دؤر نازلی؛ دونیالارا سیغیشماز بیر بؤیؤكلؤك. نیسه دونیا دا ناز، یالنیز بؤیؤك لره، وارلیلارا یاراشیقدیر. نه یازیق كی تاریخ بویو وارلیلارین یوخسوللاری سئومه سی ناغیلارا بئله یول تاپمایبدیر، تاپیبسا ندن كرم لردن، قیس لردن، فرهادلاردان جیبی دولودور زامان.

بیر بیر كوچوب گئتدی قوجا دونیادان،

سئوگی ارن لری، من ده سیراد ان

 فرهادلارین دردین قانمادی زامان،

شیرین لر هله ده یامانمیش، یامان.

سئوگی بویلارینین سون واراغیندا كرملرین اود آلدیغینین، اصلینده یانلیز، شیرینلر یاخجی آنلاییرلار نه دن لیینی.

-  اصلی اصلی یازیقدیر نار بوداغینا!

 قوی بوروسون آلوو منی كوز منی،

توخونماسین او اینجه بارماقلارین،

طیلیسیملی دویمه له ره آماندیر!!!

یازیقدیر نار بوداغینا. 

*******

قوربان گئتدین

اؤش بارماغین بیر دویمه نین نازینا،

دردلی كرم،آمان كرم، یان كرم.

آدین یانیخ سینه لره، پرده لره یاراشیق

یانیخ كرم، یازیخ كرم، جان كرم.

 سنه، یانا یانا یالواریب دا دئمه دی می!!  "اصلی اصلی، كرم ائیله كؤلؤمه". نه دن اونو له له سینین قوجاغیندان آییریب، سؤرگؤن یئلین اته یینه سووردون. قورخوردون كی بلكه بیردن او جان بسر كؤللردن، یئنی بیر كرم دوغولا ؟    

یقین یوردو بو كدرلی سؤزلر سنی، امینم كی اوره ییندن بو سؤز گئچیر:

_ كس سسینی آغلی آزمیش قوجا كافتار

شاعیر اولان، عومور بویو شیرین شیرین، لیلی لرین ایشیغیندان، قاش گؤزونون یاراشیغین یازمالیدیر، 

سن سه، سرسم، آغزی باشینا، دانیشیغین ایتیرمیش قودورقون بیر فاغیر، هئچ بیلمیر كی نه سؤیله ییر نه یازیر....

_ سن كیمسن كی دییه سن كی

منیم قارا گؤزوم اوسته قاشیم واردیر؟ 

احمد محمدپور

اینتیظار اینجی لری

گوز یاشیمدان اینجی لری[1] دؤزه دؤزه گوزله ییرم

سؤرؤ سؤرؤ یاناغیمدان سؤزه سؤزه گوزله ییرم

 

سئل اولوب آشدی باشیمدان دنیز قوردوم گوز یاشیمدان

خسته خسته یورقون یورقون اؤزه اؤزه گوزله ییرم

 

ائشیتمیشم صاباح آخشام گله جكسن بیزه قوناق

اوباشدان دان سو سَپمیشم كؤچه میزه گوزله ییرم

 

اوزه رلیك سالمیشام سه نه، اوزه رلیك یان ده نه ده نه

اوزه رلیك سال قاداسینی یامان گوزه گوزله ییرم

 

گل اول مه نه درد اورتاغی[2] یئتیشیب دیر گلماق چاغی

ائوین یاراشیق قوناغی دور گل بیزه گوزله ییرم

 

دئدین بیر گون گله جه یه م گلیب سنی سئوه جه یم

آیلار ایللر حسرت حسرت، دوزه دوزه گوزله ییرم

 

یئر سالمیشان سینه م اوسته هر نه دئسن گوزوم اوسته

سین مه گیلن[3] دیزین اوسته بؤزه بؤزه، گوزله ییرم

احمد محمدپور

---

[1] - اینجی : میرواری

[2]  - درد اورتاغی : دردداش، ]شریك غم[

[3]  - سین مه ك : دیزله ری قوجاقلییب بؤزؤشمه ك

سئودا یاری بؤلؤندؤ

یان یانا یدیق یاتاغدا،

                             پروین ناغیل دئییردی

ناغیل كی باشا چاتدی

                               گویدن بیر آلما دوشدو

  من دئدیم ایكیمیزین

                     خوشبختلیق آلمامیز دی

سن منه باخا باخا

                  آلمانی یاری بولدون !

احمد محمدپور

شوخ گؤزل

احمد محمدپور