بیز بو مقاله­‌ده ایستیریك گؤرك هئرمئنوتیك­له ادبی تنقیددین نه ایلگیسی وار؟ اصلینده بو قونو منیم اؤزومون توش گلدیییم بیر قونودور. اون ایله یاخین اؤنجه  سوره­ كله مكتوبلاشدیغیمیز بیر دوستا یازدیغیم جوابلارین بیر یا ایكی­سینده – او زامان چوخدا اؤنمسَمه­­ دن- هئرمئنوتیكی بیر تنقید كیمی آدلاندیرمیشدیم. آنجاق نه ­دنسه  ذئهنیمده گیزلنمیش بئله بیر تئرمین- هر یادا دوشدوكده- ایشین بیر یئردن آخساق اولدوغونو  منه دویدوروردو. بیریاندان هئرمئنوتیكین آنلاتما و آیدینلیق گتیرمه گؤرَولی اولدوغونو و هابئله هئرمئنوتیكسل چالیشیغلارین هئچ بیر اؤزه­ل قایدا و قورالا سیغینابیلمه ­دییینی  بیلیردیم و منطیقجه ­سینه اونون بیر تنقید مكتبی كیمی اولدوغونا اینانمیردیم، آنجاق آیری یاندان رولان بارت­ین، محمدتقی غیاثی «نقد تفسیری» آدیلا فارسجایا چئویردییی «یورومسال تنقید»كتابی منده بئله بیر ائحتیمال اویادیردی: “اولمویا یوزومسال تنقید دییه بیر تئرمین واریمیش؟” او زامان بو سورغونون اؤزوم اوچون آچیقلانماسی آردالاندی. دؤرد بئش ایل سورا، یئنه­ ده بو سورغو گؤز اؤنومده دوردو. بیر نئچه قایناغا باش ووردومسادا یوزومسال تنقید آدلی بیر قونویا راست گلمه­ دیم. “نه ­دن كیمسه بونو بیر تنقید كیمی آدلاندیرمامیش و یوزومسال تنقیده گؤره هئچ ­نه یازمامیشدی؟”بو بیر اؤنملی سورغویدو.  بو ایكی­ باشلی­لیق منی آرتیق اوخوماغا یؤنَتدی. اوخودوغوم بوتون قایناغلار هئرمئنوتیكی آنلاما و آنلاتما چالیشیقلارینین یول­تانیما (روش شناسی)سی و – اؤزللیكله مودئرن هئرمئنوتیكده- فئنومئنولوژیله یوغرولموش فلسفی بیر گؤروش اولدوغونو سؤیلوردو.  و تنقیده گلدیكده یالنیز قادامئرین بو قونودا اؤزه ­ل باخیشلارین و هابئرماس  و بیر سیرا فلسفه­ چی و ادبی تنقیدچیلرله دارتیشدیغی و وئردییی جوابلارین و دئیوید كوزنز هوی­ون «تنقیدسل حالقا» آدلی كیتابیندا آزاجیق آچیقلامالارین گؤردوم. آنجاق باشقا ایشلره گؤره قونو یئنه­ ده سؤنوك قالدی. بو یاخینلاردا قوقئل­ده آختاراركن یئنه­ ده  بو قونویلا راستلاشدیقدا بیر سیرا مقاله­ لر گؤردوم. مقاله­ لرین چوخو یورگئن هابئرماس­ین قادامئرله دارتیشدیغیندا اورتایا سوردویو، هئرمئنوتیكده بیر تنقیدسل آچینین گركدییینه گؤره اولسایدی دا، بیر پاراسی هئرمئنوتیكی بیر ادبی تنقید مكتب كیمی دوشونموشدو. بو ایسه منی آرتیق آختاریشا كؤنوللندیردی. بو یازی بئله بیر آختاریشین سونوجو كیمی ساییلا بیلر.