كوهنه مكتوبلار
خبر گلر داها عمرون قیشیندان،
سویویارسان –
ساچلارینا قار دوشر
آنجاق كوهنه كیتابلارین ایچیندن
هردن - هردن
كوهنه مكتوبلار دوشر .
اییلرسن گوتتورسن گیزلیجه
بویلانارسان-
آرواد اوشاق گورمه سین
چكیلرسن اوتاغین بیر كونجونه
گیزلی گیزلی اوخویارسان هر سوزو.
بو نه سئوگی مكتوبو دو ایلاهی
ایندی یه جن آغری ییر هر سوزو ده.
یازان قیزین نه یدی آدی ایلاهی؟
یاددان چیخیب صیفتی ده، اوزوده.
اوخودوقجا لال سطیرلر سسله نیر،
یاواش- یاواش دوشر یادینا.
بیر حرفدن - قاشی دوشر یادینا
بیر حرفدن – گوزو دوشر یادینا
او گوزلردن یادیگار تك واراقدا
گوز یاشی نین لكه سینی گوره رسن.
بیردن دونو خیشیلدایار اوتاقدا
پنجره دن كولگه سینی گوره رسن.
دیكسینرسن بویلانارسان قاپی یا؛
"او كولگه نی آرواد - اوشاق گوردومو ؟!"
تئز مكتوبی آتارسان كول قابی یا
یاندیرارسان هر سوزونو سطرینی.
سوزلر یانار كاغیذی دا یاندیرار
سوزلر یانار، او قیزی دا یاندیرار
سوزلر قاچار، او آلوون ایچیندن
سن باخدیقجا
باسار سنی سویوق تر.
سیرا سیرا قارا قاریشقالار تك
قاچیب گئدر قارا – قارا حرفلر.
تكجه او قیز قاچا بیلمز بو اوددان
بیر قوش اولوب اوچا بیلمز بو اوددان
او قیز یانار بو آلوون ایچینده
گویه قالخار او آلوون دیل لری
او آلوون دیل لرینه سارماشیب
یانار- یانار اوزون - اوزون تئللری
یانار بیر واخت ساچلارینی اوخشایان
اوزون - اوزون بارماقلاری اللری.
او قیز یانار-
ارشه چیخار توستوسو
كاغیذ یانار
كول قابیدا كولله نر.
قفیل بیردن
كول قابی نین ایچیندن
یئره دوشوب یئره اوزوك دیییرله نر.
لاپ اوزونو ایتیررسن - باخارسان
او اوزویو گوتوره رسن باخارسان
بو اوزویو آخی هاردا گورموسن؟
بو اوزویو گورمه مسن بلكه هئچ.
سن او قیزا هاچان اوزوك وئرمیسن؟
اونا اوزوك وئرمه میسن بلكه هئچ.
اروادیندا قافیل گیررقاپیدان:
-الینده كی نه دی - ؟ - دئیر.
-اوزوك دو.
- او اوزویو نه یاخشی كی تاپمیسان
نئچه واخت دی ایتیرمیشدیم گزیردیم.
سونرا گلر سندن آلار اوزویو:
-بونون رنگی نییه بئله قارالیب؟
بارماقینا گوجله سالار اوزویو :
-ائله بیل كی بیر بالاجا دارالیب .
كول قابیندان توستو قالخار هله ده.
او مكتوبون كولو هله ایشارار
ماددیم- ماددیم دوروب باخار آروادین
او توستودن بیر جوت گوزو یاشارار.
-هیچ اولماسا پنجره نی آچ – دئیر
بوردا نئجه اوتورموسان سن نئجه ؟!
بو نه یانیق قوخوسودو، ایلاهی
ائله بیل كی آدام یانیب ایندیجه...
رامیز روشن