مغمین اینتیظار
بو یورقون، بو خسته، مَغمین[1] گوزلریم
تیكیلیب یوللارا، اینتیظاردادیر
خومار خومار باخیر گه لیب گئده نه
هله ده گوزلری گئدن یاردادیر
سولغون باخیشیندا بیر معصوم مسیح
چكیلیبدیر خاچا[2] اوجا داردادیر
سیسقا اولدوزلار[3] تك سوزسه ده گوزوم
بئناوا هله ده شارها شاردادیر
توخونما گل ساغین[4] یورقون گوزله ره
آخی یار آختاریر ایز دالینجادیر
سویله سحر یئلی آللاه دان اوترو
كولومو سو ووران تئللر هاردادیر
دئمه تانیمیرام دئمه بیلمیرم
دئمه كی او نیشان روزگار [5]دادیر
بوشونا چالیشیر چاراسیز طبیب
بیلمیر كی درمانیم او نیگار دادیر
شیرین گونلرینی آندیقجا كؤنؤل
اونا حسرت چكیر، آغو لار دادیر[6]
ایچیمده بیر سس وار دئییر دال بادال
سون دفعه، سون گوروش ، سون باهار[7]دادیر
احمد محمدپور
[1] - مغمین : بئناوا، بئچارا
[2] - خاچ : ]صلیب[
[3] - سیسقا اولدوز : سونمه گه یاخینلاشان اولدوز
[4] - ساغینماق : گوزله مه ك، ]مواظیب اولماق[
[5] - روزگار : یئل
[6] - آغو : زه هر، آجی
[7] - سون باهار : كؤز، پاییز(بو شعرده قیامت آنلامیندادیر)